ҚР Мемлекеттік сыйлығының иегері, Қазақстанның еңбек сіңірген өнер қайраткері, «Парасат» және «Барыс» ордендерінің иегері, профессор, академик, Темірбек Жүргенов атындағы Қазақ ұлттық өнер академиясының құрметті ұстазы Ескен Сергебаевтің 85 жылдық мерейтойына арналған «ҰСТАЗҒА ТАҒЗЫМ» атты шәкірттерінің шығармашылық көрмесі және дөңгелек үстел
Күні: 19.05.2025 ж.
Басталуы: Көрменің ашылуы сағат 11.00-де, Дөңгелек үстел сағат 11.30-да.
Өтетін орны: Темірбек Жүргенов атындағы Қазақ ұлттық өнер академиясы
Мекен-жайы: Алматы қ., Панфилов көшесі 127-үй, Бөгенбай батыр көш. қиылысы.
Құрметті өнер өнер сүйер қауым! Сіздерді 2025 жылдың 19 мамыр күні Темірбек Жүргенов атындағы Қазақ ұлттық өнер академиясы «Көркемсурет» кафедрасының ұйымдастыруымен өтетін Шоқан Уәлиханов атындағы ҚазКСР Мемлекеттік сыйлықтың иегері, Қазақстанның еңбек сіңірген өнер қайраткері, «Парасат» және «Барыс» ордендерінің иегері, профессор, академик, Темірбек Жүргенов атындағы Қазақ ұлттық өнер академиясының құрметті ұстазы Ескен Сергебаевтің 85 жылдық мерейтойына арналған «ҰСТАЗҒА ТАҒЗЫМ» атты шәкірттерінің шығармашылық көрмесіне және дөңгелек үстеліне қатысуға шақырамыз!
Ұлттық өнер академиясында өтетін бұл шара – Темірбек Жүргенов атындағы Қазақ Ұлттық өнер академиясының негізін қалаушылардың бірі, «Академиялық сурет» және «Мүсін» кафедраларының ашылуына атсалысып, «Кескіндеме, мүсін және дизайн» факультетінің қалыптасып, дамуы жолында көп еңбек сіңірген, 50 жылдан астам ұстаздық қызметінде көптеген шәкірттер тәрбиелеген, монументалды ескерткіштер мен мүсіндік туындылардың авторы болып қазақстандық бейнелеу өнерінің дамуына зор үлес қосқан кәсіби суретші-мүсінші Ескен Аманжолұлы Сергебаевтің шығармашылығына арналады.
Көрмеде «Мүсін» мамандығының әр жылдардағы түлектері — Ескен Сергебаевтің шәкірттері, белгілі отандық суретшілер: Бауыржан Байділда, Болат Тұрғынбай, Эдуард Казарян, Нұрғалым Исабаев, Талғат Серікбаев, Қазыбек Дулатов, Дәурен Мұхамеджанов, Ақылбек Орманбеков, Сабыр Қонарбаев, Талғат Жұмағұлов, Тимур Ермұхаметов, Айдос Бүркітбаев, Гаухар Қасенбай, Данияр Сарбасов, Тұрсын Қапақов, Бахтияр Қайранбаев және басқалары қатысады.
Барша өнерсүйер қауымды осы маңызды шараға қатысуға шақырамыз!
Байланыс телефондары:
«Кескіндеме, мүсін және дизайн» факультетінің деканы
Бауыржан Нұрбекұлы Байділда — 87771328844
«Көркемсурет» кафедрасының меңгерушісі
Болат Сырлашұлы Тұрғынбай — 87471366132
«Көркемсурет» кафедрасының аға оқытушы, шәкірті
Ақылбек Абзелбекұлы Орманбеков — 87072688695
АНЫҚТАМА
Ескен Аманжолұлы Сергебаев — 1940 ж. Алматы қаласында дүниеге келген. Ресейдің И.Е. Репин атындағы Санкт-Петербург Мемлекеттік көркемсурет академиясының түлегі, ҚР СО мүшесі, Шоқан Уәлиханов атындағы ҚазКСР Мемлекеттік сыйлықтың иегері (09.12.1982 ж.), Қазақстан Республикасының еңбек сіңірген қайраткері (27.08.1992 ж.), «Парасат» (05.12.2008 ж.) және ІІІ дәрежелі «Барыс» (02.12.2021 ж.) ордендерінің кавалері, өнертану мамандығының профессоры (ҚР ЖАК, 26.12.2002 ж.), ҚР Көркемсурет академиясының академигі.
Орта кәсіби білімді Н.В. Гоголь атындағы Алматы көркемсурет училищесінде ұстазы Х.Е. Наурызбаевтан алса, жоғары кәсіби білімді Ресейдің Ленинград қаласындағы И.Е. Репин атындағы Мемлекеттік көркемсурет академиялық институтында В.П. Пинчук, М.К. Аникушин секілді кеңестік белгілі мүсіншілерден алып шеберлігін шыңдаған.
Профессор Е.А. Сергебаев ұстаздық қызметті 1969-1974 ж. Алматы көркемсурет училищесінен бастап, 1978-1993 жылдары Алматы театр және көркемсурет институтында, қазіргі кезде Темірбек Жүргенов атындағы Қазақ ұлттық өнер академиясында сабақ беріп келеді.
Қазақстан Республикасының еңбек сіңірген өнер кайраткері, еліміздегі мүсін өнерінің хас шеберлерінің бірі Ескен Сергебаевтың шығармашылығы көпшілік қауымға жақсы таныс. Ол 1960 жылдан бастап жасаған мүсіндерімен көрмелерге қатысып, станоктік, монументалды, монументалды-сәндік мүсін саласында көптеген туындыларды дүниеге әкелді. Атап айтсақ: Мұхтар Әуезов, Әл-Фараби, Әбілқайыр хан, Абай, Д.Қонаев, Н.Тілендиев, H.Байғанин, I.Жансүгіров, Б.Бисекбаев, Б.Соқпақбаев, С.Торайғыров, Т.Жүргенов, А.Тоқпанов, С.Нұрмағанбетов, Ұ.Құлымбетов, Н.Ондасынов сияқты көптеген отандық тұлғаларға арналған портреттік туындылары, сонымен қатар «Махамбет пен Исатай» монументалды кешендегі «Қазақ эпосы» рельефтік композициясы, «Әлия Молдағұлова» монументалды кешендегі рельефтік композициясы, «Дос-Мұқасан ансамблі» және тағы басқа да мүсіндік шығармаларымен елге танымал болды.
Бүгінде профессор Ескен Сергебаевтың елге белгілі болып жемісті еңбек етіп жүрген шәкірттері өте көп, олардың туындылары сұранысқа ие болып отандық өнерді дамытуға өз үлестерін қосып жатыр.
Жалпы, шебер мүсінші Е.Сергебаевтың болмыстық қасиеттері мәдени-рухани ізденістерде айқын көрініс тауып, төлтума, ұлттық рухы биік, ой-тұжырымы берік жаңа туындылардың иесі атанды. Оның еңбектері қазақ халқының тарихын ұлы тұлғалары арқылы зерделеуге талпындырады.
Негізгі монументалды мүсін ескерткіштері:
- «Мұхтар Әуезов» ескерткіші, М.Әуезов атындағы Қазақ мемлекеттік академиялық драма театры, Алматы қ., 1980 ж.;
- «Әбу Насыр әл-Фараби» ескерткіші, Шымкент қ., 1998 ж.;
- «Нұрғиса Тілендиев» ескерткіші, Алматы обл., Жамбыл ауылы, 2000 ж.;
- «Әбілқайыр хан» ескерткіші, Ақтөбе қ., 2001 ж.;
- «Әбу Насыр әл-Фараби», әл-Фараби атындағы ҚазҰУ, Алматы қ. 2004 ж;
- «Ахмет Жұбанов» ескерткіші, Ақтөбе қ., 2008 ж.;
- «Темірбек Жүргенов» ескерткіші, Т.Жүргенов ат. ҚазҰӨА, Алматы қ., 2001 ж.;
- «Сұлтанмахмұт Торайғыров» ескерткіші, Павлодар қ., 2003 ж.;
- «Әлия Молдағұлова» ескерткішіндегі барельеф, Ақтөбе, 2005 ж.;
- «Исатай және Махамбет» кешеніндегі барельеф, Атырау қ., 2005 ж.;
- «Сәрсен Аманжолов» ескерткіші, Өскемен қ., 2006 ж.;
- «Дос-Мұқасан» ескерткіші, Павлодар обл., Баянауыл, 2008 ж.;
- «Абай Құнанбаев» ескерткіші, Өскемен қ., 2009 ж.;
- «Асқар Тоқпанов» ескерткіші, Алматы қ., 2015 ж. және т.б. көптеген бюсттік және станоктік мүсіндер авторы.
