26 ақпан күні Алматы қаласында ҚР Ғылым және жоғары білім министрі Саясат Нұрбек пен Ұлттық ғылым академиясының президенті Ақылбек Күрішбаев 9 жас ғалымға пәтер сертификаттарын табыстады. Бұл Мемлекет басшысының жас ғалымдарға қолдау көрсету, олардың әлеуметтік мәртебесін арттыру және ғылымға жас кадрлардың келуін ынталандыру жөніндегі тапсырмасын орындау аясында жүзеге асты.
Бұл марапатқа ие болған ғалымдардың ішінде Темірбек Жүргенов атындағы Қазақ ұлттық өнер академиясының бас ғалым хатшысы Бекмолдинов Нартай да бар. Бұл – академия тарихындағы өнер саласында еңбек етіп жүрген жас ғалымның алғаш рет мемлекеттік тұрғын үй бағдарламасы аясында пәтер сертификатын алуы.
Нартай Сағымбекұлы – өнертану саласындағы ғылыми зерттеулермен айналысып жүрген ғалым, оның еңбектері Қазақстандағы өнер мен мәдениетті зерттеуге айтарлықтай үлес қосуда. Бұл марапат өнер саласындағы ғылыми еңбектің маңыздылығын көрсетіп, жас ғалымдарға үлкен ынталандыру беретін маңызды қадам болып табылады.
Қазақ ұлттық өнер академиясының ұжымы әріптесімізді шын жүректен құттықтай отырып, оның болашақтағы ғылыми және шығармашылық жұмыстарына сәттілік тілейді!
