Бүгін Темірбек Жүргенов атындағы Қазақ ұлттық өнер академиясында Қазақстан Республикасы Президентінің кеңесшісі Мәлік Отарбаев студенттер және оқытушылармен маңызды кездесу өткізді. Бұл шараның басты мақсаты – Мемлекет басшысы Қасым-Жомарт Тоқаевтың Қазақстан халқына Жолдауының негізгі тұстарын талқылап, оның еліміздің болашағына тигізер ықпалын түсіндіру болды.

Кездесу барысында академияның көрнекті өкілдері, халық артисі Тұңғышбай Жаманқұлов, еңбек сіңірген қайраткер Ғанижамал Абилдина және Смағұл Елубай өз ойларымен бөлісіп, Жолдаудың маңыздылығын ерекше атап өтті. Әсіресе, Мемлекет басшысының елдегі саяси және әлеуметтік әділдікті нығайтуға бағытталған бастамалары кеңінен талқыланды.

Мәлік Отарбаев   өз сөзінде Жолдауда көтерілген әділдік қағидаларының қоғамдағы орнына тоқталып, оның еліміздің дамуы мен тұрақтылығына қосатын үлесін тереңірек ашып берді. Ол әділдіктің тек қана саяси жүйеде емес, сонымен қатар күнделікті өмірде де маңызы зор екенін айтты. Сондай-ақ, студенттерге бұл құндылықтарды түсіну мен сақтау жолында өз үлестерін қосу қажеттігін ерекше атап өтті.

Кездесу соңында студенттер мен оқытушылар көкейлеріндегі сұрақтарын қойып, мазмұнды пікір алмасу өтті. Бұл кездесу жас ұрпақ үшін үлкен тәрбие мектебі болып, қоғамдағы әділдік пен жауапкершілік туралы терең ойларға жетеледі.