Өзбекәлі Жәнібековтың 95 жылдық мерейтойы қарсаңында қазақ халқының рухани жаңғыруына өлшеусіз үлес қосқан көрнекті мемлекет және қоғам қайраткері, тарихшы, этнограф, ғалымның құрметіне мазмұнды да терең әдеби-танымдық кеш өтті.

23 сәуір күні сағат 11:00-де «Сән және костюм дизайны» кафедрасы «Өзбекәлі Жәнібеков — ұлттық рухтың сақтаушысы: қазақ костюмі мен дәстүрлерінің тарихшысы» атты іс-шара өткізді. Бұл кеш ұлттық сана, тарихи жады мен мәдени құндылықтардың үйлесімді үндестігіне айналды. Іс-шараның басты мақсаты — Өзбекәлі Жәнібековтің рухани-мәдени мұрасын кеңінен насихаттау, жастардың ұлттық болмысқа, дәстүр мен тарихқа деген қызығушылығын ояту.

Кеш аясында көрермендер қазақ халқының бай мәдени мұрасын бейнелейтін дәстүрлі костюмдермен танысып, олардың тарихи әрі символдық мәнін тереңірек түсінуге мүмкіндік алды. Бұл — ата-бабалар аманатына деген құрметтің, қасиетті мұраға ұқыпты қараудың жарқын көрінісі болды.

Өзбекәлі Жәнібековты еске алуға оның жақын туыстары — Бауржан Өзбекәліұлы Жәнібеков, Жұлдыз Жәнібекова, Азель Жәнібек-Шәріпова, замандастары — Нұрбеков Жандос Маратович, Қожабаев Ерлан Жанахметович, сондай-ақ мәдениет қайраткерлері, суретшілер мен өнертанушылар, атап айтқанда Мұқан Амангелді Оразбайұлы, журналист Гүлнар Танкаева қатысты. Кештің модераторлары — Темірбек Жүргенов атындағы Қазақ ұлттық өнер академиясының аға оқытушысы Лайла Абдығаниқызы Кенжебаева және доценті Гүлнар Жамбылқызы Бекибаева болды. Іс-шара барысында айтылған шынайы естеліктер тыңдаушылардың жүрегіне терең әсер етті. Әрбір айтылған сөз бен ұсынылған өнер туындысы Өзбекәлі Жәнібековтің рухани биіктігін және ол өмірін арнаған ұлттық рухтың ұлылығын айқын бейнеледі.

Бұл кеш тек еске алу ғана емес, сонымен бірге рухани жаңғыру жолындағы маңызды бағдар, ұлттық мұра мен құндылықтарға адал қызмет етудің жарқын үлгісі болды.