2025 жылдың 29 қыркүйек пен 3 қазан күндері Ресейдің Мәскеу қаласында С.А. Герасимов атындағы Бүкілресейлік мемлекеттік кинематография университеті ТМД мемлекеттерінің кино саласындағы бірлескен білім беру жобасын іске асырып жатыр. Темірбек Жүргенов атындағы Қазақ ұлттық өнер академиясының ректоры Арман Жүдебаев аталған іс-шараға жұмыс сапарымен барды. Сондай-ақ Кино және телевидение факультетінің деканы Мадина Бакиева бастаған бірқатар студенттер жоба бағдарламасына қатысады.
Іс-шара аясында шығармашылық жоғары оқу орындары ректорларының кездесуі, киножобалар көрсетілімі, ғылыми-практикалық конференциялар жоспарланған. Олардың қатарында «Восхождение» халықаралық студенттер фестивалі, «ТМД елдері кинематографиясындағы Ұлы Отан соғысы: тарих және заманауи көзқарас» халықаралық ғылыми-тәжірибелік конференциясы, «Қазіргі киноның түрлері, жанрлары мен технологиялары: жас кинематографистердің басымдықтары» халықаралық жастар конференциясы бар.
Жоба бағдарламасындағы «Восхождение» фестивалінде Армения, Әзербайжан, Беларусь, Қырғызстан, Ресей, Тәжікстан, Өзбекстан және Қазақстан мемлекеттерінің өкілдері бас қосады.
