2025 жылдың 27 қаңтарында «Қазақстан» телеарнасының «Таңшолпан» бағдарламасына Темірбек Жүргенов атындағы Қазақ ұлттық өнер академиясының бірқатар ұстаздары мен докторанттары қатысып, қазақ киносының алтын қорына енген туындылардың көркемдік ерекшеліктері жайында сұхбат берді.

Бағдарламаға арнап сұхбат берген  ұстаздар қатарында кинотанушы, «Кино тарихы мен теориясы» кафедрасының меңгерушісі, PhD докторы Баубек Нөгербек, «Кино тарихы мен теориясы» кафедрасының доценті, PhD докторы Аида Машурова, кинотеледраматург, «Кино тарихы мен теориясы» кафедрасының және «Кино және ТВ» факультетінің аға оқытушысы Қолғанат Мұрат, докторант Эльмира Пшенаева болды.

Сұхбат барысында олар Алматы қаласының бейнесі көрсетілген қазақ фильмдерінің көркемдік мазмұны мен тарихи құндылығын атап өтті. Шәкен Аймановтың «Біздің сүйікті дәрігер», «Тақиялы періште», Қанымбек Қасымбековтың «Шоқ пен Шер», Талғат Теменовтың «Махаббат бекеті» фильмдері қазақ кинематографиясының шоқтығы биік туындылары ретінде талқыланды.

Мысалы, Шәкен Аймановтың «Біздің сүйікті дәрігер» музыкалық комедиясында сол кездегі Қазақстан астанасы Алматы қаласы еліміздің мәдениет пен өнер ордасы ретінде бейнеленген. Фильмде Алматы прогресс пен жаңашылдықтың символы ретінде көрсетіліп, оның табиғи сұлулығы мен жанға жайлы атмосферасы қазақ халқының ұлттық болмысымен үйлесімді байланыста суреттелген. Қазақ кинематографиясының осындай туындылары халқымыздың мәдениетін, дәстүрін, тарихи кезеңдерін бейнелеп қана қоймай, ұлттық болмысты өнер арқылы ұрпақтан ұрпаққа жеткізуде маңызды рөл атқарады.