2026 жылғы 27–28 наурыз күндері Темірбек Жүргенов атындағы Қазақ ұлттық өнер академиясының кинозалы мен кітапханасында Бишнуприя Датт — Халықаралық Театр Зерттеушілері Федерациясының Президенті, Джавахарлал Университеті “Өнер және эстетика мектебінің” профессоры, PhD докторы — лекциялар мен шеберлік сабақтарын өткізді.
Шеберлік сабақтарының тақырыптары:
- “Тарихи жадыны қайта жаңғыртудағы батыл әрекеттер және отарлық байланыстардан арылу кеңістіктері: Үндістан мен Ұлыбритания театрлары мен перформанстарындағы жаңа серпіндер”
- “Артивизм: үнділік әйел орындаушылар және бірегейлікті қалыптастыру”
Іс-шараға Академияның профессорлық-оқытушылық құрамы, магистранттар мен PhD докторанттар қатысты. Лекциялар жоғары ғылыми деңгейде өтіп, тыңдаушылардың белсенді қатысуымен мазмұнды пікірталас ұйымдастырылды.
Талқылау барысында қатысушылар заманауи театрдағы деколониалдық үдерістер, тарихи жады, гендерлік перформативтілік және өнер мен белсенділіктің (artivism) өзара байланысы мәселелерін талқылады. Әсіресе екінші тақырып — әйел орындаушылардың өнердегі және қоғамдағы рөлі, олардың жеке және ұжымдық бірегейлікті қалыптастырудағы маңызы ерекше қызығушылық тудырды.
Профессор Bishnupriya Dutt өз баяндамасында artivism ұғымын өнер мен саяси белсенділіктің тоғысуы ретінде қарастырып, оның постколониалдық қоғамдағы рөлін атап өтті. Үндістандағы феминистік перформанс тәжірибелері мысалында қазіргі театрдың әлеуметтік әділеттілік, гендерлік теңдік және демократиялық құндылықтарды нығайтудағы ықпалы көрсетілді.
Сонымен қатар, профессор Бишнуприя Датт Орталық Азияда алғаш рет Темірбек Жүргенов атындағы Қазақ ұлттық өнер академиясы мен Қазақстан Республикасының Мәдениет және ақпарат министрлігіне қарасты шығармашылық ұйымдармен бірлесіп, болашақта 700–1000-ға жуық әлем ғалымдарының қатысуымен International Federation for Theatre Research халықаралық конференциясын өткізу жоспарланып отырғанын атап өтті.
Сондай-ақ, International Federation for Theatre Research бастамасымен Академия базасында Орталық Азия мен әлем елдерінің жас зерттеушілері, магистранттары мен PhD докторанттарына арналған халықаралық Summer School бағдарламасын ұйымдастыру жоспарлануда.
Бұл іс-шаралар Академияның халықаралық ғылыми ынтымақтастығын нығайтып, театр және перформанс зерттеулері саласындағы жаңа мүмкіндіктерге жол ашады.
