5 мамыр күні Темірбек Жүргенов атындағы Қазақ ұлттық өнер академиясында Кино және телевизия факультеті, «Медиажурналистика» мамандығының 3-курс студенттерінің «Offline САНА» атты кітабының тұсауы кесілді. Бұл еңбек заманауи медиакеңістіктегі саналы тұтыну мәдениетін қалыптастыру, ақпаратты дұрыс іріктеу және цифрлық дәуірдегі тұлғаның ойлау еркіндігін сақтау жолындағы жас ізденушілердің шығармашылық жұмысының нәтижесі болды. Жоба жас медиамамандардың қоғамдағы өзекті мәселелерге деген көзқарасы мен кәсіби ұстанымын айқын көрсетті.
Іс-шара барысында студенттер кітаптың негізгі мазмұнын сахналық қойылымдар арқылы шығармашылықпен ұштастыра таныстырып, авторлар мен қонақтар арасында еркін пікір алмасу алаңы ұйымдастырылды. Тұсаукесерге медиа саласының білікті мамандары, танымал журналистер мен шығармашылық орта өкілдері қатысып, жас авторлардың тырнақалды туындысына жоғары баға берді.
