2026 жылғы 11–15 мамыр аралығында «Дизайн» кафедрасының доценті, PhD докторы Наурызбаева Айнаш Сағатовна Erasmus+ бағдарламасы аясында Краковтағы Ян Матейко атындағы өнер академиясында (Польша) тәжірбие алмасты.
Бағдарлама аясында Академия студенттеріне арналған дәрістер курсы мен тәжірибелік воркшоптар ұйымдастырылды. Дәрістерде Қазақстанның мәдениеті, өнері мен дизайнының тарихи аспектілері, көркем құндылықтары және заманауи архитектуралық орта дизайнының даму перспективалары қамтылды. Ал тәжірибелік сабақтар интерьерлік ортаны этникалық ою-өрнек элементтері арқылы қалыптастыруға бағытталған кәсіби дағдыларды дамытуға арналды.
Іссапар барысында Ян Матейко атындағы өнер академиясының кітапхана қорына 2025 жылғы 22 сәуірде Темірбек Жүргенов атындағы Қазақ ұлттық өнер академиясында өткен «Визуалды сәйкестік және мәдени мұра: сақтау және ілгерілету» атты халықаралық ғылыми-тәжірибелік конференция материалдарының жинағы табысталды.
Бағдарламаның қорытындысы ретінде Erasmus+ академиялық ұтқырлық бағдарламасы бойынша білім алып жатқан студенттердің есеп беру көрмесі ұйымдастырылды. Көрмеде кескіндеме, графика, мүсін, дизайн және анимациялық графика бағытындағы жұмыстар ұсынылды. Қазіргі таңда Ян Матейко атындағы өнер академиясында «Анимация» білім беру бағдарламасы бойынша Академиямыздың 3-курс студенті Маратова Мөлдір білім алуда.
