12 желтоқсан 2024 жылы Темірбек Жүргенов атындағы Қазақ ұлттық өнер академиясында Қазақстанның еңбек сіңірген қайраткері, «Парасат» және «Барыс» ордендерінің иегері, Халықаралық «Алаш» сыйлығының лауреаты, Қазақстанның Құрметті жазушысы Ханбибі Есенқарақызымен шығармашылық кездесу өтті. Бұл кездесу ақынның 75 жылдық мерейтойына арналды.

Академия студенттері құрметті қонақты «Нурикамал» әнін орындап, қарсы алды, сахна төрінде өз авторлық өлеңдерін оқыды. Әсем лирикалық әуен кешке ерекше әсер берді.

Кездесу барысында ақынның өмір жолы, шығармашылығы мен поэзия әлеміне қосқан үлестері туралы қысқаша баяндалды. Слайд-шоу арқылы көрермендер оның өмірі мен еңбектеріне байланысты фотосуреттерді, кітап мұқабаларын және марапаттарын тамашалады.

Ханбибі Есенқарақызы өз шығармашылық жолындағы қызықты естеліктерімен бөлісіп, студенттердің сұрақтарына жауап берді. Сұрақтар арасында ақынды шабыттандыратын жайттар, шығармашылық жолдағы маңызды сәттері және қазақ поэзиясының болашағы туралы сұрақтар болды.

Кеш соңында ақын барша қауымға алғысын білдіріп, жастарға шабытты еңбек, зор жетістіктер тіледі. Іс-шара «Нурикамал» әнінің орындалуымен аяқталды.