26-27 наурыз күндері Шымкент қаласындағы «ZIYATKER TURAN» мектебінде «University Fair» атты университеттер көрмесі өтті. Кәсіби бағдар беру мақсатында ұйымдастырылған бұл іс-шараға Қазақстан мен шетелдің жиырмадан астам жетекші оқу орындары қатысты.

Аталған көрмеге Темірбек Жүргенов атындағы Қазақ ұлттық өнер академиясының өкілдері де қатысып қайтты. Өнертану факультетінің Кино тарихы мен теориясы кафедрасының аға оқытушылары Көпбай Гүлім мен Мурат Холганат, сондай-ақ Кино және ТВ факультетінің Анимация режиссурасы және интерактивті медиа кафедрасының меңгерушісі, оқытушы Абельдинов Адай талапкерлерге кәсіби бағдар беріп келді.

Көрме барысында Академияның білім беру бағдарламалары туралы презентация көрсетіліп, академиялық ұтқырлық бағдарламалары таныстырылды. Сонымен қатар қабылдау талаптары мен оқуға түсу шарттары туралы кең көлемді ақпарат ұсынылды. Мұндай кәсіби алаңдар Академия үшін де қажет. Себебі өнер ордасы жайлы өңірлік жастардың жан-жақты мағлұмат алып, саналы түрде болашақ мамандығын таңдауына мүмкіндік жасау маңызды.