27 наурыз күні Академия Ректоры Арман Әділханұлы Уорвик Университеті шығармашылық өнер, театр, перформанс және визуалды мәдениеттер мектебінің директоры, IFTR мүшесі профессор Милия Глуховичті (Ұлыбритания) және Театр зерттеушілері халықаралық федерациясының (IFTR) Президенті, Джавахарлал Неру Университеті, Өнер және эстетика мектебінің PhD докторы профессор Бишнуприя Датты қабылдады.Ректорат залындағы кездесуде ғылыми жұмыс проректоры Қабыл Халықов, халықаралық ғылыми жобалар бойынша профессор Сания Қабдиева мен Юлия Сорокина болды.
Ең алдымен, Академия ректоры шетелдік делегацияны және бүкіл Академия ұжымын айтулы мереке – 27 наурыз Халықаралық театр күнімен шын жүректен құттықтап, болашақта қазақ театр өнерінің әлемдік деңгейде өркендеуіне және шәкірттеріміздің әлемдік сахналарды бағындыруына шынайы шығармашылық табыс тіледі.
Академиямызға келулеріңіз біз үшін үлкен мәртебе әрі стратегиялық жетістік дей отырып, ректор бұл сапардың Академия үшін маңызы өте зор бірқатар тұстарына тоқталды:
2025 жылы Уорик университетімен (Ұлыбритания) қол қойылған меморандум аясында Академия докторанттары мен ғалымдарының аталған университетте ғылыми тағылымдамадан өтіп, халықаралық семинарларда дәріс оқуы оқу орнының әлемдік білім кеңістігіндегі орнын нығайта түскені айтылды;
Ұлыбритания университеті тарапынан PhD докторанттарға шетелдік ғылыми кеңесшілік жүргізу театр саласындағы зерттеулер мен диссертациялар сапасының халықаралық деңгейге көтерілуіне оң ықпал етіп, Темірбек Жүргенов атындағы Қазақ ұлттық өнер академиясы қорғау процесінің сапасын арттыруда маңызды рөл атқарып отырғанын М. Глухович атап өтті;
Темірбек Жүргенов атындағы Қазақ ұлттық өнер академиясының Еуроодақтың «Жібек жолы» ғылыми-зерттеу жобалары бойынша 16 мемлекеттен құралған консорциум құрамына мүшелік етуі қосдипломды білім беру бағдарламаларын жүзеге асыруға мүмкіндік беріп отыр;
Театр зерттеулері халықаралық федерациясының (IFTR) Президенті, профессор Б. Датт Орталық Азияда және Қазақстанда алғаш рет Жүргенов академиясы мен Мәдениет және ақпарат министрлігіне қарасты шығармашылық ұйымдармен бірлесіп, театр-перформанс және визуалды өнер бағыттары бойынша 700-1000-ға жуық әлем ғалымдарының қатысуымен халықаралық конференция өткізуді жоспарлап отырғанын мәлімдеді;
«Театр зерттеулері халықаралық федерациясы» (IFTR) ұйымдастыруымен Жүргенов академиясында Орталық Азия және әлем елдерінің жас зерттеушілері, магистранттары мен PhD докторанттарына арналған ғылыми-зерттеу бағытындағы «Summer School» халықаралық бағдарламасын өткізу көзделіп отыр;
Аталған халықаралық ынтымақтастықтар нәтижесінде Темірбек Жүргенов атындағы Қазақ ұлттық өнер академиясы Орталық Азиядағы театр зерттеулерінің жетекші Академиялық хабына айналуды мақсат еткенін Академия ректоры Арман Әділханұлы атап көрсетті.
