Күні кеше Мәскеу қаласында Ресейдің Театр өнері институты – ГИТИС ұйымдастырған «ГИТИС – мастер-класс» VIII халықаралық театр фестивалі өтті. ТМД елдерінің 9 өнер ордасын бір сахнада тоғыстырған фестивальге Қазақстаннан Темірбек Жүргенов атындағы Қазақ ұлттық өнер академиясының Драма театры және кино әртісі мамандығының 2-курс студенттері қатысты. Бұл фестивальге қатысудағы негізгі мақсат – мәдени байланыстарды нығайту, жас сахнагерлерді кәсіби ортада шыңдау, сондай-ақ театр педагогикасындағы жаңа әдістермен танысу.

Фестиваль сапары барысында Академия делегациясын Театр өнері факультетінің деканы, өнертану ғылымдарының магистрі Мадияр Сарыбай бастап барды. Әр ел өздерінің ұлттық театр дәстүрін бейнелейтін спектакльдер ұсынған ГИТИС сахнасында профессор, Қазақстанның еңбек сіңірген қайраткері Ерлан Біләл шеберханасының студенттері «Қозы Көрпеш-Баян сұлу» эпосын қойды. Спектакль мәскеулік көрерменге қазақ тілінде сахналанды.

Халықаралық сахнада өнер көрсеткен студенттердің бұл жетістігі – кәсіби дайындықтың, үлкен еңбектің нәтижесі. Сапардан алған шабыт пен тәжірибе алдағы уақытта қазақ театрының жаңа тынысын ашуға оң ықпалын тигізетініне сенімім мол.