Саяси қуғын-сүргін және ашаршылық құрбандарын еске алу күні қарсаңында Темірбек Жүргенов атындағы Қазақ ұлттық өнер академиясының ректоры Арман Жүдебаев ұжыммен бірге оқу орнының ғимараты алдындағы Темірбек Жүргенов ескерткішіне гүл шоғын қойды. Рәсімге қатысушылар саяси қуғын-сүргін және ашаршылық құрбандарын бір минут үнсіздікпен еске алды.
Жиында сөз алған Академияның ректоры Арман Жүдебаев бұл күнді насихаттаудың маңызын айтты.
- Тарихта ұлтымыз қаншама қилы замандарды бастан кешірді. Бүгінде бейбіт уақытта еңсесін тіктеген еліміз әлемдік бәсекеде абыройлы орнын ұстап келеді. Біз әрдайым Тәуелсіздік пен мемлекеттілік оңай келмегенін және оны сақтау аманаты әрбіріміздің мойнымызда екенін айқын түсінуіміз керек, -деп қорытындылады.
Іс-шараға қатысқан қонақтар қатарында Академия ғимаратының алдында тұрған Темірбек Жүргенов бюстінің авторы, Мемлекеттік сыйлықтың иегері, Қазақстанның Еңбек сіңірген қайраткері, «Парасат», «Барыс» ордендерінің кавалері, профессор – Ескен Сергебаев, ардагер-ұстаз, Қазақстан журналистер одағының мүшесі, Мәдениет қайраткері – Сәбит Иманғалиев, Республикалық «Таңшолпан» журналының бас редакторы, жазушы – Нұрлыбек Саматұлы, Саяси қуғын-сүргін және ашаршылық құрбандары қауымдастығының төрағасы, жүргеновтанушы-ғалым, Әл-Фараби атындағы Қазақ ұлттық университетінің доценті Бауыржан Иманғалиев болды.
