2026 жылғы 12 қарашада Темірбек Жүргенов атындағы Қазақ ұлттық өнер академиясында Уорвик университетінің профессоры Милия Глуховичпен (Ұлыбритания) кездесу өтті. Іс-шараға Академияның профессор-оқытушылар құрамы, докторанттары мен магистранттары қатысты.
Кездесуде Халықаралық театр зерттеулері федерациясы (IFTR) аясында ұйымдастырылатын «Жібек жолдары бойындағы өзара байланысты тарихтарды сахналау және кураторлық ету: Үндістан, Қазақстан және Орталық Азия, Еуропа — империялар, көші-қондар және мәдениетаралық диалогтар» атты «Жазғы мектеп» бағдарламасы талқыланды.
Жоба Темірбек Жүргенов атындағы ҚазҰӨА, Джавахарлал Неру университеті, Уорвик университеті, Белград өнер университеті және Анадолу университеті арасындағы халықаралық ынтымақтастық аясында жүзеге асырылады. Ұйымдастырушылар — Милия Глухович, Қабыл Халықов және Бишнуприя Датт.
Тараптар бағдарламаның ғылыми бағыттары мен ұйымдастыру мәселелерін, сондай-ақ 2029 жылы IFTR конференциясын Алматыда, Темірбек Жүргенов атындағы ҚазҰӨА базасында өткізу тұжырымдамасын талқылады.
Кездесу халықаралық академиялық ынтымақтастықты нығайтуға, бірлескен зерттеулерді дамытуға және жас ғалымдардың халықаралық ғылыми ортаға қатысу мүмкіндіктерін кеңейтуге бағытталды.
