2026 жылғы 1-5 қараша аралығында Музыкалық өнер факультетінің Дәстүрлі музыкалық өнер кафедрасының доценті Ұлжан Байбосынова академиялық ұтқырлық бағдарламасы аясында Өзбекстан Республикасының Нөкіс қаласында іссапарда болды. Іссапар Өзбекстан Мемлекеттік өнер және мәдениет институты Нөкіс филиалының шақыруымен ұйымдастырылды.

Сапар барысында Ұлжан Байбосынова студенттерге «Дастан жырлаудың мақам-саз ерекшеліктері» тақырыбында дәріс оқып, шеберлік сабақтарын өткізді. Қазақ және қарақалпақ халықтарына ортақ бақсылық-жыраулық өнердің ерекшеліктері, оны жас ұрпаққа үйрету, сақтау және дамыту мәселелері бойынша оқытушылармен тәжірибе алмасты.

Сондай-ақ тараптар алдағы уақытта бірлесіп жүзеге асырылатын жұмыстарды талқылап, академиялық және шығармашылық ынтымақтастықты нығайту бағыттарын қарастырды. Ортақ рухани мұраны сақтау, дәріптеу және дамыту жолындағы ынтымақтастық үшін өзбекстандық әріптестерімізге алғыс білдіреміз!