«Кино және ТВ» факультетінде «Қазақстандағы Діни экстремизмнің қаупі және оның алдын алу» тақырыбына арналған Ашық сабақ өткізілді. «Экрандық өнер режиссурасы» кафедрасының аға оқытушысы Сәуле Қасымқызы  Ахметованың бастамасымен ұйымдастырылған Ашық дәрістің негізгі өзегі – 14 наурыз күні Бурабайда болып өткен Ұлттық Құрылтайда Мемлекет басшысы Қасым-Жомарт Тоқаевтың: «Теріс ағымдарға, қазақтың болмысына жат идеологияларға тосқауыл қою қажет екеніне еш күмән жоқ. Елімізде дін бостандығына кепілдік берілген. Бірақ, жүгенсіздікке, тәртіпсіздікке жол беруге болмайды. Діннің аса маңызды миссиясы  — ұлтты ұйыстыру» — деген мәлімдемесі төңірегінде өрбіді.

                Ашық сабақты жүргізуге арнайы шақырылған дәріскер — Алматы қаласындағы ақпараттық-түсіндіру тобының мүшесі, дінтану докторанты, әл-Фараби атындағы Қазақ Ұлттық Университетінің аға оқытушысы Ұлжан Асқарбайқызы Тұнғатова, қазіргі замандағы діни экстремизм мен террористік әрекеттер қаупі — әлемдегі адамзат өміріне, қоғамның, өркениеттің дамуына орасан зор қатер төндіріп отырған зиянкес құбылыстардың бірі болып табылатындығын атап өтіп, оларды болдырмау бағытындағы алдын алу шараларын ұйымдастырудың маңыздылығына тоқталды. Бүгінде қазақтың болмысына жат теріс ағымдарға тосқауыл қою бағытындағы елімізде атқарылып жатқан іс-шаралар туралы егжей-тегжейлі баяндады.

               Кездесу барысында Дәріскер Ашық сабақ модераторы С. Қ. Ахметованың  қосымша сұрақтарына жауап бере отырып, академияның студент-жастарымен  жүргізілген бүгінгідей ашық диалогтың өзектілігін атап өтіп, осындай кездесулердің алдағы уақыттарда да өз жалғасын табатынына сенім білдірді.