2024 жылғы 11-12 желтоқсанда Алматы қаласында Қазақстан Республикасының еңбек сіңірген қайраткері, Қазақстан Театр қайраткерлері одағының мүшесі, Жамбыл атындағы халықаралық сыйлықтың лауреаты, «Отан қорғаушы» медалінің иегері, «Актерлік шеберлік және режиссура» кафедрасының доценті Ерғалым Төлендіұлы Төкеевтің 60 жылдығына арналған халықаралық ғылыми-тәжірибелік дөңгелек үстел өтті.
Дөңгелек үстелдің тақырыбы – «Театр және кино өнерін ғылыми-тәжірибелік зерттеудің өзекті мәселелері» болды. Іс-шара барысында театр мен кино өнерінің дамуы, олардың қазіргі қоғам мәдениетіне әсері туралы мәселелер талқыланды. Қазақстанның және шетелдің белгілі суретшілері, театр қайраткерлері мен зерттеушілері шараға белсенді қатысты.
Халықаралық деңгейдегі бұл шара Ерғалым Төкеевтің мәдениет пен өнерді дамытуға қосқан үлесінің маңыздылығын айқындады. Қатысушылар оның педагог, режиссер және зерттеуші ретінде театр өнерін дамытудағы орасан зор еңбегін атап өтті.
Дөңгелек үстел тәжірибе мен жаңа идеялар алмасудың маңызды алаңына айналып, мәдени және ғылыми ортадағы осындай іс-шаралардың өзектілігін айқын көрсетті.
