Темірбек Жүргенов атындағы Қазақ ұлттық өнер академиясының Кинозалында күйші, ұстаз Нұрлан Түменбаев пен Дәстүрлі музыкалық өнер кафедрасының доценті, ҚР Мәдениет қайраткері Мұрат Әбуғазы жинақтаған «Көне Тараздың күмбірлі күйлері» кітабының тұсаукесері өтті.

Қазақ халқының күйшілік өнері – теңіздей терең, дархан даламыздай кең, саф алтындай баға жетпес рухани асыл мұрамыз. Бұл кітапта көне Тараз қаласының айналасындағы, қазіргі Жамбыл облысы аймағының күйшілік өнері жан-жақты зерттеліп, 19-20 ғ. өмір сүрген және бүгінгі композиторлардың күйлері еніп отыр.

Академияның ректоры Арман Жүдебаев кітаптың тұсауын кесіп, бұл еңбек қазақ күйшілік өнерінде ерекше орын алатынын атап өтті. Сонымен қатар, Қазақстанның Халық әртісі Рамазан Стамғазы мен Қазақстанның еңбек сіңірген қайраткері Ардақ Исатаева кітаптың маңызы туралы жылы лебіздерін білдіріп, бұл жинақтың дәстүрлі музыкалық өнерге зор үлес қосатынын айтты.

Іс-шараға еліміздің белгілі өнер қайраткерлері қатысып, бұл жинаққа енген күйлерді елімізге танымал орындаушылар Саян Ақмолда, Батыржан Мықтыбаев, Салтанат Құдайбергенова, Динара Нұрбаева, Сырым Нұрмолдин, Халықаралық және Республикалық конкурстардың лауреаттары Саят Нұрәлі, Әлиасқар Еркінұлы керемет орындап берді. Музыка зерттеушілері, өнертанушы ғалымдар, ұстаздар, студенттер, магистранттар мен докторанттар да осы маңызды оқиғаға куә болды.