25 қазан – Республика күніне орай, Мемлекет басшысы Қасым-Жомарт Тоқаевтың Жарлығымен мәдениет және өнер саласындағы қызметкерлерге мемлекеттік наградалар табысталды. Марапат иелерінің қатарында Темірбек Жүргенов атындағы Қазақ ұлттық өнер академиясының профессор-оқытушылар құрамы бар.
Жоғары марапаттардың бірі – «Қазақстанның халық әртісі» атағы театр және кино өнерінің көрнекті қайраткерлері, Темірбек Жүргенов атындағы Қазақ ұлттық өнер академиясының Театр өнері факультетінің ұстаздары Болат Әбділманов пен Рахилям Машуроваға берілді;
ІІІ дәрежелі «Барыс» орденіне режиссер, актер Болат Қалымбетов лайық деп танылды;
«Парасат» орденімен каскадер, ұстаз Күнғожинов Жайдарбек және актриса, ұстаз Жүсіп Дария марапатталды;
«Қазақстанның еңбек сіңірген қайраткері» құрметті атағы әнші, ұстаз Мухитденова Бағым мен актер, ұстаз Әсет Иманғалиевке берілді;
«Құрмет» орденімен актер, ұстаз Еркебұлан Дайыров марапатталды. Сондай-ақ Алматы қаласы әкімдігінің ұсынысымен ректордың кеңесшісі Берғалиев Амантайға да осы марапат табыс етілді.
Аталған марапаттар сіздердің көпжылдық еселі еңбектеріңіздің лайықты бағалануы деп білеміз. Сіздер мәдениет саласын дамытуға сүбелі үлес қосып, өнер арқылы еліміздің рухын көтеріп, шығармашылық жолында аянбай қызмет етіп келесіздер. Әрдайым сый-құрметке бөленіп жүре беріңіздер!
