2025 жылғы 19-21 қыркүйек күндері Өзбекстанның Риштан қаласында «Rishtan 2025 International Pottery Forum / 2-Xalqaro Kulolchilik Forumi» халықаралық құмырашылар байқауы өтті. Әлемнің 60-тан астам мемлекетінен келген шеберлер бас қосқан беделді іс-шараға Сәндік өнер кафедрасының жас қолөнер шебері Баби Дінислам қатысып, өз шығармашылық туындыларын көпшілік назарына ұсынды. Оның керамика өнеріндегі заманауи тәсілдер мен ұлттық нақышты үйлестіре білген жұмысы қатысушылардың қызығушылығын тудырып, оң бағасын алды.

Бұл форум керамика өнерін дамыту, дәстүрлі қолөнер тәжірибесін насихаттау және халықаралық мәдени байланыстарды нығайту мақсатында ұйымдастырылған. Форум барысында қатысушылар өзара тәжірибе алмасып, ұлттық қолөнердің бай дәстүрлерін таныстырып, әлемдік деңгейде мәдени диалог орнатуға үлес қосты. Осындай халықаралық алаңдар жас шеберлерге шығармашылық ізденістерін көрсетуге, кәсіби дамуына және ұлттық өнердің халықаралық деңгейде танылуына зор мүмкіндік береді.