Түркістан қаласында қолөнершілер қалашығының ресми ашылу салтанаты өтті. Сондай-ақ дүниежүзілік қолөнершілер кеңесінің (World Craft Council) шешімімен Түркістан қаласының «Қолөнершілер қаласы» мәртебесіне ие болуына орай, «Түркістан – қолөнершілер қаласы» фестивалі мен «Turkistan world craft fest – 2025» халықаралық қолөнершілер көрмесі ұйымдастырылды.

Түркия, Әзербайжан, Қырғызстан, Өзбекстан, Тәжікстан, Қытай және Ресей елдерінен 100-ге жуық, еліміздің әр өңірінен 300-ге жуық қолөнер шебері бас қосқан іс-шараға Темірбек Жүргенов атындағы Қазақ ұлттық өнер академиясының Сәндік өнер кафедрасынан Сәуле Бапанова, Естай Даубаев, Ботагоз Зейнишева, Есенгазиев, Баби Дінислам қатысты.

 Салтанатты іс-шара аясында 100 керамика шебері бір мезгілде құмыра жасады. Қолөнер бұйымдарының көрмелері, шеберлік сағаттары, ұлттық киімдер мен бұйымдар жәрмеңкесі, мәдени-танымдық және концерттік бағдарламалар көпшілік назарына ұсынылды. Дәстүрлі мәдениетті дәріптеуге, халықаралық ынтымақтастықты нығайтуға қосқан үлесі үшін қала әкімі Әзімбек Пазылбекұлының алғыс хаттары табысталды.