Астанада өткен «SHABYT CINEMA» ІІІ Республикалық студенттік қысқаметражды фильмдер фестивалінде Кино және телевизия факультетінің білім алушылары жеңімпаз атанды. Биыл конкурс бағдарламасына 40 фильм ұсынылды.

Үздік фильм номинациясы «Үміт» көркем фильмінің режиссері, Темірбек Жүргенов атындағы Қазақ ұлттық өнер академиясының 2024-2025 оқу жылының түлегі Әділ Қабижановқа берілді. Сонымен қатар жеңімпаз «Alem Empire» кинокомпаниясының арнайы сыйлығымен марапатталды.

Үздік сценарий аталымын Көркем фильм режиссурасы мамандығының 4-курс студенті Кәкен Әмірдің «Жазда атамның ауылында» фильмі алды.

Үздік дыбыс режиссурасы номинациясына Режиссура мамандығының 1-курс магистранты Көркем Бекбашеваның «Дос ізімен» фильмі лайық деп танылды.

Үздік трейлер жүлдесі Көркем фильм режиссурасы мамандығының 2-курс студенті Жанабай Бейбарыстың «Менің атым Қожа» фильміне берілді.

Сондай-ақ «Jas òner» журналының жүлдесі Академия студенті, жас режиссер Мырза Махамбетке «Аруназ» көркем фильмі үшін табысталды.

Бұл фестиваль – жас таланттардың кәсіби ортаға қадам басуына мүмкіндік беретін маңызды шығармашылық алаң. Жаңа буын авторларға мазмұнды әрі мағыналы, көрерменге ой салатын картиналар көп болсын дейміз.