2025 жылдың 13-20 қазан аралығында Қытай Халық Республикасының Сиань қаласында «Единым сердцем – совместное создание великолепия тақырыбында алғашқы халықаралық Қытай – Орталық Азия Жібек жолы өнер форумы өтті. Бұл маңызды мәдени іс-шараға Қазақстан атынан Сәндік өнер кафедрасының профессоры Сауле Сыздыққызы қатысты.
Форумның басты мақсаты – Қытай мен Орталық Азия елдері арасындағы өнер мен мәдениет саласындағы ынтымақтастықты тереңдету, сондай-ақ шығармашылық байланыстарды нығайту және тәжірибе алмасу алаңын қалыптастыру болды. Іс-шара барысында қатысушылар көркем және сәндік-қолданбалы өнер, заманауи дизайн, мүсін және бейнелеу өнері салаларындағы өз жұмыстарын таныстырып, өзара пікір алмасты. Форум аясында көрмелер, шеберлік сабақтары, ғылыми-тәжірибелік конференциялар және мәдени бағдарламалар ұйымдастырылды.
Профессор Сауле Сыздыққызы Қазақстанның сәндік өнері мен ұлттық қолданбалы дәстүрлерінің ерекшеліктерін таныстырып, қазақтың көркем мұрасын заманауи бағытта насихаттаудың маңызын атап өтті. Форум нәтижесінде қатысушылар мәдени диалог пен достық байланыстарды одан әрі дамыту, сондай-ақ Жібек жолының тарихи мұрасын қазіргі заман талабына сай жаңғырту жөнінде ортақ шешімге келді.
