«Түстің оянуы» көрмесі — бұл жоба атауы ғана емес, сонымен қатар оның ішкі мәні. Көктем келген сайын әлем жаңа түстерге бөленеді — дәл осы сергектік, қуат және түйсікке толы ояну көрменің лейтмотивіне айналды. Көктем – жаңғырудың метафорасы ретінде – авторларды түстің философиясын көркем тұрғыда ұғынуға шабыттандырды: түстің қабылдауға әсерін, оның эмоционалдық қанықтығын, визуалды баяндаудағы рөлін зерттеуге жетеледі.

Экспозицияда «Операторлық өнер» білім беру бағдарламасының 1 курс студенттерінің жұмыстары ұсынылған. Әрбір кадр — түске арналған жеке медитация, ішкі рефлексия мен үн қатудың көрінісі. Бұл фотосуреттердегі түс — тірі және тыныс алады. Ол кадрдың ырғақтық құрылымын жасайды, атмосфераны айқындайды және өз бойында эмоциялық шиеленісті алып жүреді. Ал бояулардың жарқыраған палитрасымен қатар, мұнда ақ-қара және монохромды композициялардағы тыныштық та бар. Бұл — қарсы қою емес, диалог.

Махаббат, үміт, сенім, жалғыздық, құмарлық, отбасы мен қамқорлық тақырыптары визуалды сөйлемдерге айналып, бірде жұмсақ, бірде өткір реңктермен өріледі — мезгілдердің ауысуы секілді. Бұл өмірлік иірімдер тікелей баяндау арқылы емес, визуалды тілдің нәзік дірілдерімен — жарықтың, форманың және, әрине, түстің ойынымен көрініс табады.

Әрбір фотосурет — фотокомпозиция мен операторлық ойлаудың синтезі. Бұл — түстің құштарлығына және жарық пен көлеңке контрастына толы кадрлар. Бұл — жарық табиғатымен шығармашылықта тоғысқан жұмыстар. Мақсаты — әлемді жай ғана бейнелеу емес, оны қайтадан тереңінен сезіну.

Жобаның авторлары:

• «Операторлық өнер» білім беру бағдарламасының 1 курс студенттері

Жобаның жетекшісі:

• Қосай Ренат Қадырұлы, «Дыбыс режиссурасы және операторлық өнер» кафедрасының доценті

Көрме 2025 жылдың 21–27 сәуір аралығында Темірбек Жүргенов атындағы ҚазҰӨА фойесінде өтеді.