2025 жылдың 20 қараша күні Темірбек Жүргенов атындағы Қазақ ұлттық өнер академиясының көрме залында «Алуан» жас өнертанушылар лабораториясының ұйымдастыруымен мүсін өнеріне арналған «Уақыт, пішін, кеңістік» шығармашылық көрмеcі өтті.

Бұл көрмеде кәсіби қазақ мүсін өнерінің қалыптасуына айрықша үлес қосқан шеберлер – Ескен Сергебаев, аға буын мүсіншілер Мәлік Жүнісбай, Шоқан Төлеш, Болат Құсайынов, сондай-ақ қазіргі жас буын өкілдері Ринат Шыныбаев пен Багдат Сарсеннің бірқатар туындылары көрермен назарына ұсынылды. Шеберлердің пластикалық ізденістері мен стильдік ерекшеліктерін айқындайтын бұл шығармалар көрменің көркемдік аясын кеңейте түсті. Сонымен қатар мүсін бағыты бойынша білім алып жатқан студенттердің шығармашылық жұмыстары көрменің мазмұнын толықтырып, жас авторлардың кәсіби мүмкіндіктерін танытты. Іс-шара барысында Өнертану мамандығының 4-курс студенттері қойылған мүсіндерді өнертанулық тұрғыдан талдап, олардың композициялық шешімдері мен көркемдік ерекшеліктеріне аналитикалық шолу жасады. Көрме уақыт пен кеңістікті пішін арқылы бейнелеудің түрлі қырларын көрсетіп, отандық мүсін өнерінің дәстүрі мен қазіргі бағыттарының сабақтастығын айқын танытқан мәнді мәдени іс-шара болды.