Жошы Ұлысының 800 жылдығына арналған іс-шаралар аясында
Қазақстан Республикасы Ғылым және жоғары білім министрлігінің Жошы Ұлысының тарихи мұрасын ілгерілету жөніндегі ақпараттық сүйемелдеудің медиа-жоспарын іске асыру аясында 2026 жылғы 14 тамызда Темірбек Жүргенов атындағы Қазақ ұлттық өнер академиясында «Кино, театр және визуалды мәдениеттегі Алтын Орданың бейнесі» тақырыбында ғылыми дөңгелек үстел өтеді.
Аталған ғылыми іс-шараның мақсаты – Жошы Ұлысының (Алтын Орда) тарихи мұрасын қазіргі кино, театр және визуалды мәдениет контексінде ғылыми тұрғыдан зерделеу, ұлттық тарихи сананы нығайту, қазақ мемлекеттілігінің тарихи сабақтастығын дәріптеу және тарихи тақырыптарды қазіргі көркемдік кеңістікте жаңаша пайымдау.
Бүгінгі таңда тарихи мұраны сақтау мен насихаттау тек тарих ғылымының ғана емес, өнертану, театртану, кинотану, мәдениеттану және гуманитарлық ғылымдардың да маңызды міндеттерінің біріне айналып отыр. Осы тұрғыдан алғанда, дөңгелек үстел ұлттық мәдени кодты, тарихи жадыны және рухани құндылықтарды қазіргі өнердің көркемдік құралдары арқылы таныту мәселелерін талқылайтын маңызды ғылыми пікірталас алаңы болмақ.
Іс-шара барысында Жошы Ұлысының тарихи-мәдени мұрасы, Алтын Орданың ұлттық бірегейлікті қалыптастырудағы орны, оның кино өнеріндегі, театр сахнасындағы және визуалды мәдениеттегі көркемдік бейнесі, сондай-ақ тарихи тақырыптарды заманауи шығармашылық тұрғыдан интерпретациялау мәселелері кеңінен қарастырылады.
Ғылыми дөңгелек үстелдің жас зерттеушілер, докторанттар, магистранттар және студенттер үшін де маңызы ерекше. Мұндай ғылыми кездесулер болашақ өнертанушылардың, театртанушылардың, кинотанушылардың және мәдениеттанушылардың ғылыми-зерттеу мәдениетін қалыптастырып, олардың ұлттық тарих пен мәдени мұраға деген қызығушылығын арттырады. Сонымен қатар қатысушылар тәжірибелі ғалымдардың баяндамаларын тыңдап, өзекті ғылыми мәселелер бойынша пікір алмасуға, пәнаралық зерттеу бағыттарымен танысуға және кәсіби ғылыми ортада тәжірибе жинақтауға мүмкіндік алады.
Дөңгелек үстелдің қорытындылары ұлттық тарихи сананы нығайтуға, қазақ мемлекеттілігінің қалыптасу тарихын ғылыми тұрғыдан тереңірек түсіндіруге және Жошы Ұлысының тарихи мұрасын қазіргі өнер арқылы кеңінен дәріптеуге ықпал етеді. Мұндай ғылыми бастамалар жастардың бойында отансүйгіштік құндылықтарды қалыптастыруға, тарихи сабақтастықты дәріптеуге және ұлттық мәдени мұраны сақтауға бағытталған маңызды ағартушылық қызмет атқарады.
Темірбек Жүргенов атындағы Қазақ ұлттық өнер академиясы еліміздегі жетекші шығармашылық жоғары оқу орны ретінде ұлттық мәдени мұраны зерттеу, сақтау және оны қазіргі өнер кеңістігінде жаңаша таныту бағытындағы ғылыми жобаларды жүйелі түрде жүзеге асырып келеді. Академия қабырғасында ұйымдастырылатын осындай ғылыми іс-шаралар отандық өнертану ғылымының дамуына, шығармашылық білім беру сапасының артуына және Қазақстанның мәдени-гуманитарлық әлеуетін халықаралық деңгейде танытуға өз үлесін қосады.
Іс-шараның ашылуында Темірбек Жүргенов атындағы Қазақ ұлттық өнер академиясының ректоры, Қазақстанның еңбек сіңірген қайраткері, «Құрмет» орденінің иегері Жүдебаев Арман Әділханұлы құттықтау сөз сөйлейді.
Ғылыми баяндамалармен:
- Нұрмұхамбетов Ардақ Амангелдіұлы, философия докторы (PhD), Қазақстан тарихы және әлеуметтік ғылымдар кафедрасының доцент м.а. – «Алтын Орда: тарихы мен тағылымы»;
- Акчалов Ерлан Едлович, Экрандық өнер режиссурасы кафедрасының доценті – «Ұлттық бірегейлік коды ретіндегі Алтын Орда: кино мен теледидар үшін жаңа сын-қатерлер» тақырыптарында баяндама жасайды.
Дөңгелек үстелдің модераторы – философия ғылымдарының докторы, профессор, Темірбек Жүргенов атындағы Қазақ ұлттық өнер академиясының ғылыми жұмыстар жөніндегі проректоры Халықов Қабыл Заманбекұлы.
Іс-шараға Қазақстан Республикасы Ғылым және жоғары білім министрлігінің, Қазақстан Республикасы Мәдениет және ақпарат министрлігінің өкілдері, жоғары оқу орындарының профессор-оқытушылар құрамы, ғалымдар, докторанттар, магистранттар, студенттер, жас зерттеушілер және шығармашылық қауым өкілдері қатысады.
Өтетін күні: 14 тамыз 2026 жыл
Уақыты: 11:00
Өтетін орны: Темірбек Жүргенов атындағы Қазақ ұлттық өнер академиясы, Ректорат залы.
Баршаңызды ғылыми дөңгелек үстел жұмысына белсенді қатысуға шақырамыз!
