Алматы қаласы музейлер бірлестігіне қарасты «Almaty Gallery» галереясында 2026 жылғы 23 сәуір күні сағат 17:00-де Жас суретшілер одағының «ZAMANDASTAR-IV» көрмесінің салтанатты ашылуы өтті.

Іс-шараның ашылуында Алматы қаласы Мәдениет басқармасының басшысы — Данияр Абзалиденұлы Алиев және «Жас суретшілер одағы» қоғамдық бірлестігінің төрағасы — Нұрлан Қаленұлы Сатаев құттықтау сөз сөйледі.

«ZAMANDASTAR-IV» көрмесінде жас суретшілердің туындылары ұсынылған. Қатысушылар қатарында Темірбек Жүргенов атындағы Қазақ ұлттық өнер академиясының «Кескіндеме, мүсін және дизайн» факультетінің оқытушылары, түлектері, магистранттары мен студенттері бар: Оралбек Кабоке, Алмас Нұрғожаев, Дәуренбек Бекназаров, Алишер Жүргенов, Данияр Сарбасов, Нұрболат Аскар, Айгерім Оспан, Тұрғын Абдрахман, Нұрлан Сатаев, Бауыржан Досжанов, Сұлтан Аманжол, Махаббат Сағындық, Елдос Азаматұлы, Әлия Қабикожаева, Өркен Аят, Зарина Чукетаева, Анастасия Ильинова, Рамазан Тасболат. Көрме кураторы — Санжар Сырғабаев.

Көрменің басты ерекшелігі – мұнда бір ғана стиль немесе тақырып үстемдік етпейді, сондай-ақ ортақ тақырып та жоқ. Керісінше, бір кеңістікте түрлі көркемдік үндер мен шығармашылық ізденістер тоғысқан. Классикалық реализмнен бастап декоративтік жинақтауға дейін, нәзік портреттік шешімдерден ауқымды пейзаждық және жанрлық композицияларға дейін көрерменге шығармашылық тәсілдердің кең ауқымы ұсынылған. Авторлық қолтаңбалардың айырмашылығына қарамастан, оларды біріктіретін ортақ мақсат – өмірді өнер тілімен сезіну. Көрме 2026 жылдың 6 мамырына дейін жалғасады.

«ZAMANDASTAR» жобасы — 2019 жылы Темірбек Жүргенов атындағы Қазақ ұлттық өнер академиясының «Көркемсурет» кафедрасының оқытушылары, суретшілер Нұрлан Сатаев пен Тұрғын Абдрахман бастамашы болған авторлық көрме жобасы.