• 29.11.2021

Жақсылықова Меруерт Болатқанқызы

  • ҚазҰӨА
  • Жақсылықова Меруерт Болатқанқызы

«Өнертану» факультетінің деканы, театртанушы, өнертану кандидаты, Т.Қ.Жүргенов атындағы Қазақ ұлттық өнер академиясының доценті. Қазақстан Театр қайраткерлері Одағының (2004) және Халықаралық Театр сыншылары ассоциациясының (IATC, 2018), Халықаралық Театр сыншылары бірлестігінің (IUTC, 2019) мүшесі.

2002 жылы Т.Қ.Жүргенов атындағы Қазақ ұлттық өнер академиясын Театртану мамандығы бойынша Қазақстанның еңбек сіңірген қайраткері, Мемлекеттік Сыйлықтың лауреаты, театр сыншысы Әшірбек Сығайдың шеберханасын бітірген. 2002 – 2003 жылдары Астанадағы Қ.Қуанышбаев атындағы қазақ академиялық музыкалық-драма театрында «Әдебиет бөлімінің» меңгерушісі қызметін атқарды. 2003 – 2006 жылдары Т.Қ.Жүргенов атындағы Қазақ ұлттық өнер академиясы «Театр өнерінің тарихы мен теориясы» кафедрасының аспирантурасында оқып, 2010 жылы «Қазақ кәсіби актерлік өнерінің даму ерекшеліктері» тақырыбында кандидаттық диссертация қорғады. Ғылыми жетекшісі – өнертану кандидаты, профессор Сания Қабдиева.

2006 жылдан «Қазақстан Театр қайраткерлері Одағы» Республикалық бірлестігінде редактор, 2009 жылдан аталмыш Одақтың Жауапты хатшысы. 2011 жылдан Республикалық әдеби-театртанымдық «Театр.kz»журналының жауапты хатшысы болды.

2008 жылдан бастап Т.Қ.Жүргенов атындағы Қазақ ұлттық өнер академиясының «Театр өнерінің тарихы мен теориясы» кафедрасында оқытушы, аға оқытушы, доцент қызметін атқарып келеді. «Театр теориясы», «Театр сыны», «Шетел театрының тарихы», «Драма теориясы», «Қазіргі әлемдік театрлық процесс», т.б. пәндер бойынша дәріс оқиды. Бірнеше буын актерлер мен режиссерлерді, театртанушыларды, сонымен қатар, театр зерттеушілерін: магистранттар мен докторанттарды тәрбиелеуге  ат салысуда.

1998 жылдан М.Б.Жақсылықованың мақалалары баспасөз беттерінде жариялана бастаған. Қазіргі театрлық үдерістер жөнінде көптеген ғылыми мақалалар жариялады. 2008 жылы «Әлемдік өнертану» сериясы бойынша жарық көрген «Әлем театрының тарихы» ұжымдық монографиясының «Классицизм дәуіріндегі театр», «Неміс театры», «Үнді театры» бөлімдерін жазды. 2014 жылы «Қазақ кәсіби актерлік өнерінің даму ерекшеліктері» атты монографиясы жарық көрді.

«Театр өнерінің тарихы мен теориясы» кафедрасында даярланатын театртану мамандандыруы бойынша бакалавриат, магистратура және докторантура деңгейлеріндегі  Білім беру бағдарламасының авторы.

2006 жылдан бастап әр түрлі деңгейдегі халықаралық, республикалық, аймақтық театр фестивальдерінің қазылар алқасы мүшесі ретінде өзінің сыни пікірлерін білдіріп келеді. Республикалық «Тәуелсіздік толғауы» шығармашылық жұмыстарға арналған байқауының эксперттік комиссиясының тұрақты мүшесі.

2010 жылдан Қазақстан Театр қайраткерлері Одағына қарасты «Еңлікгүл» Кәсіби Сыйлығының эксперттік комиссиясының төрағасы, әрі ұйымдастырушысы.

ҚР Мемлекеттік тапсырысы бойынша «Рухани жаңғыру» бағдарламасы аясында «Жаңа гуманитарлық білім «100 жаңа оқулық» негізінде көрнекті театр зерттеушісі Кристофер Балмның «Театртануға кіріспе» атты кітабын қазақ тіліне аударып, он-лайн лекцияларын даярлады.  

«Қазақстан Республикасының Тәуелсіздігіне 20 жыл» мерекелік медалімен, Қазақстан Театр қайраткерлері Одағының «Құрмет» грамотасымен марапатталған. Республикалық театр фестивалінің «Үздік театртанушы» аталымы бойынша лауреат (2017).

 М.Б.Жақсылықова педагогика мен ғылым саласын қатар алып келе жатқан мамандарымыздың бірі. Кәсіби біліктілігімен, көпшілікпен тіл табыса білетін қабілетімен дараланатын, еңбекқор маман.