2025 жылғы 3-4 желтоқсан күндері Татарстандағы Қазан мемлекеттік мәдениет институтында «Дәстүрлі мәдениет пен халықтық көркем шығармашылықтың көпқырлы әлемі» III Халықаралық ғылыми-тәжірибелік конференциясы өтті. Форумға Қазақстан, Беларусь, Өзбекстан және Ресейдің Еділ бойы өңірлерінен келген ғалымдар мен сарапшылар қатысты.
Темірбек Жүргенов атындағы Қазақ ұлттық өнер академиясының атынан Сценография кафедрасының меңгерушісі, профессор, PhD докторы Меруерт Еркінқызы Жангужинова «Этнофутуризм костюм тарихын оқытудағы мәдениетаралық диалогты қалыптастыру әдістемесі ретінде» тақыбында баяндамасын ұсынды.
Конференцияны Татарстан Республикасының мәдениет министрі Ирада Аюпова ашып, өз ұлттық тамырын сақтаудың және мәдени мұраны терең зерделеудің маңызын атап өтті. Пленарлық отырыс әр елдің жетекші ғалымдарын біріктірді. Негізгі баяндамалар этномәдени дәстүрлерді заманауи форматта дамытуға, фольклордың өркендеуіне, жоғары оқу орындарының мұраны сақтаудағы рөліне және заманауи өнердің цифрлық технологиялармен өзара байланысына арналды. Пленарлық отырыстан кейін сессиялық жұмыстар екі бағытта жалғасты: 1. Фольклорлық мұраны зерттеу және интерпретациялау; 2. Дәстүрлі мәдениеттің ақпараттық кеңістіктегі орны және этно-көркем білім.
Тувалық фольклордан бастап заманауи Қазақстан этно-коллекцияларына және жасанды интеллектінің шығармашылыққа әсеріне дейін қамтылған талқылаулар мазмұнды болды. Жалпы 70-тен астам баяндама ұсынылып, іс-шараның халықаралық деңгейін көрсетті. Секциялық жұмыстардың нәтижелері әзірленіп жатыр, алдағы уақытта үздік зерттеулер жаңа ғылыми жобалардың негізіне айналмақ.
