2025 жылғы 17 ақпанда Темірбек Жүргенов атындағы Қазақ ұлттық өнер академиясының Қазақстан тарихы және әлеуметтік ғылымдар кафедрасының ұйымдастыруымен «Мәдениеттану» пәні аясында «Көшпелілер мәдениеті – қазақ рухының сахналық коды» атты иммерсивті ашық сабақ өткізілді. Сабақты кафедраның доценті Божбанбаев Бауыржан Мұратбекұлы ұйымдастырып, жүргізді. Іс-шараға Театр өнері факультетінің 3 курс студенттері қатысты.
Сабақтың мақсаты – көшпелілер мәдениетінің негізгі элементтерін (тұрмыстық жәдігерлер, музыкалық мұра, философиялық дүниетаным) театр өнерінде сахналық код ретінде меңгерту, иммерсивті театр әдістері арқылы тарихи-мәдени материалдарды заманауи сахналық тілге (пластика, дыбыс, перформанс) аудару дағдыларын дамыту, сонымен қатар музыка, би және драматизация арқылы кейіпкер мен орта арасындағы эмоционалды байланысты орнату және актерлік шеберлікті жетілдіру болды.
Сабақ иммерсивті перформанс форматында өтті. Іс-шара барысында теориялық және практикалық бөлімдер үйлестірілді: көшпелілер мәдениетінің мәні, рухани код ұғымы таныстырылып, театр, би, күй және поэзия арқылы мәдениет сахналық тілде ашылды. Студенттер аңыздар мен эпостардан қысқаша сахналық көріністер қойып, драмалық ойлау мен тағдырлық таңдау тақырыптарын көрсетті.
Домбыраның рухани-маңызды рөлі, күйдің тарихи жады мен эмоциялық код ретінде қолданылуы, би арқылы еркіндік пен кеңістіктің философиясын жеткізу тәжірибелік түрде көрсетілді. Батырлық мәдениет пен қару-жарақтың символикалық мәні, батырлықтың рухани және дене дайындығы арқылы қалыптасуы бейнематериал және сахналық көріністерде ашылды. Сонымен қатар көшпелілердің материалдық мәдениеті – киіз үй, ер-тұрман, қару-жарақ – тарихи-символдық мәнімен қарастырылып, поэзия мен эпостар рух философиясын көрсетті.
Қорытынды бөлімде сабақ барысында студенттердің тарихи-мәдени материалдарды сахналық тілге айналдыру қабілеті көрсетіліп, иммерсивті формат шығармашылық белсенділікті арттырып, көрерменмен тікелей эмоционалды байланыс орнатуға мүмкіндік бергені атап өтілді. Іс-шара ғылыми мазмұн мен сахналық әрекетті ұштастыра отырып, көшпелілер мәдениетінің рухани және материалдық кодтарын заманауи театр кеңістігінде жаңаша түсінуге жағдай жасады. Қорытынды сөз Қазақстан тарихы және әлеуметтік ғылымдар кафедрасының меңгерушісі, профессор Алимжанова Алия Шарабековнаға берілді.
