2026 жылдың 12 қаңтарында Темірбек Жүргенов атындағы Қазақ ұлттық өнер академиясында академиялық мәселелер жөніндегі қызметінің бастамасымен «Өнер саласындағы білім беру бағдарламаларын дамытудың заманауи бағыттары: сапа, инклюзия, инновациялар» тақырыбында дәстүрлі әдістемелік апталық басталды.
Темірбек Жүргенов атындағы Қазақ ұлттық өнер академиясының Оқу театрында әдістемелік апталықтың ашылу рәсімі өтті. Апталықтың ашылу рәсімінде Академияның ғылыми жұмыс жөніндегі проректоры, ф.ғ.д., профессор Қабыл Халыков құттықтау сөз сөйлеп, апталықтың маңызы мен негізгі бағыттары туралы айтып берді.
Пленарлық отырыстың тақырыбы – «Көркем білім беруді дамытудың заманауи сын-тегеуріндері мен басымдықтары». Пленарлық отырыс барысында өнер саласындағы зерттеулерді жетілдірудің әдіснамалық және инновациялық модельдері, инклюзивті білім беру тәжірибелері, жоғары оқу орындары мен әлеуметтік институттар арасындағы серіктестік, сондай-ақ көркем білім берудің трансформациясы мәселелері талқыланды. Іс-шарада спикерлер өз тәжірибелерін ортаға салып, өзекті баяндамаларын ұсынды.
Алдағы апталық аясында жасанды интеллект технологияларын білім беру бағдарламаларында қолдану, білім беру бағдарламаларын жобалау мен жаңартудың өзекті тәсілдері, шығармашылық жоғары оқу орнында инклюзивті білім берудің заманауи модельдері бойынша секциялар, панельдік сессиялар, дөңгелек үстелдер мен воркшоптар өткізіледі. Іс-шара аралас форматта (бетпе-бет және онлайн) ұйымдастырылып, профессор-оқытушылар құрамы, оқу орнының қызметкерлері, докторанттар және шақырылған спикерлердің кәсіби тәжірибе алмасуына арналған тиімді алаңға айналмақ.
