2024 жылғы 9 желтоқсанда Темірбек Жүргенов атындағы Қазақ ұлттық өнер академиясында «Желтоқсан – қазақ халқының өшпес жарасы» тақырыбында тәрбие сағаты өтті. Іс-шара «Хореография», «Музыка», «Халық аспаптары» және «Дәстүрлі ән» факультеттерінің 1-курс студенттері үшін ұйымдастырылды.

1986 жылғы Желтоқсан оқиғасы – қазақ тарихындағы ең маңызды бетбұрыс кезеңдерінің бірі. Бұл оқиға ұлттық бірлік пен егемендікке ұмтылыстың символына айналып, тәуелсіз Қазақстанның алғашқы қадамына жол ашты.

Іс-шара барысында студенттер арнайы дайындалған «1986 жылғы Желтоқсан» атты деректі фильмді көрсетіп, патриоттық әндер орындады, өлеңдер оқып, Қазақстанның тәуелсіздігіне арналған бейнероликтер ұсынды.

Желтоқсан оқиғасының маңыздылығы мен оның ел тарихындағы рөлі ерекше аталып өтті. Мұндай іс-шаралар жастардың тарихты құрметтеп, бейбітшілік пен татулықтың маңызын түсінуіне ықпал етеді. Желтоқсанның сабақтары бейбіт өмір мен ұлтаралық татулықтың қадірін ұмытпауға үндейді.