10 қазан күні Мәскеу қаласында Қазақстан Республикасы мен Ресей Федерациясы арасындағы мәдени-гуманитарлық ынтымақтастық бойынша Кіші комиссияның төртінші отырысы өтті. Басқосуға екі елдің Мәдениет министрлері – ҚР Мәдениет және ақпарат министрі Аида Балаева мен РФ Мәдениет министрі Ольга Любимова төрағалық етті. Сондай-ақ жиынға екі ел делегациялары, мәдениет мекемелерінің өкілдері қатысты.

Жиын барысында өзара ынтымақтастықты одан әрі дамытуға бағытталған басты мәселелер – кинематография, кітапхана, музей ісі және мәдениет саласындағы білім беру бағыттарындағы бірлескен іс-шаралар кеңінен талқыланды.

Сонымен қатар Кіші комиссия отырысы аясында Темірбек Жүргенов атындағы Қазақ ұлттық өнер академиясы мен ГИТИС Ресейдің театр өнері институты арасындағы ынтымақтастықтың тиімділігін арттыру жөніндегі Жол картасына қол қойылды. Бұл құжатта актерлік шеберлік, сахна тілі, хореография, театр менеджменті және продюсерлік бағыттардағы бірлескен бастамалар қамтылған.