12 желтоқсан күні ҚР Мәдениет және ақпарат министрлігінің қолдауымен Темірбек Жүргенов атындағы Қазақ ұлттық өнер академиясы мен Жүсіпбек Елебеков атындағы республикалық эстрада-цирк колледжі бірлесіп, «Alumen Development» ЖШС-мен жаңа жатақхана құрылысына қатысты ынтымақтастық туралы келісімге қол қойды. Аталған келісім тараптардың бір жылға жуық уақыт бойы жүргізген дайындық жұмыстары мен келіссөздерінің нәтижесінде жүзеге асты.
Келісімге қою рәсіміне Академия ректоры Арман Жүдебаев, колледж ректоры Жеңіс Сейдуллаұлы, сондай-ақ «Alumen Development» ЖШС Бас директоры Төлеген Байтжаунов қатысты.
Жаңадан бой көтеретін жатақхана құрылысы «Alumen Development» ЖШС қолдауымен іске асырылмақ. Компания нысан толық пайдалануға берілгенге дейінгі барлық жұмыс кезеңіне қатысады. Ғимараттың іргетасы Қаныш Сәтбаев көшесінде орналасқан Академияның бос жер учаскесінде қаланады.
Студенттерді жайлы жатақханамен қамтамасыз ету – болашақ өнер мамандарын қолдаудың және олардың оқу мен шығармашылықпен айналысуына қолайлы жағдай жасаудың маңызды бөлігі саналады.
