2024 жылғы 19-21 қараша аралығында Темірбек Жүргенов атындағы Қазақ ұлттық өнер академиясында «Дизайн» бағыты бойынша 17-ші Республикалық студенттік пәндік олимпиаданың алғашқы кезеңі өтті.  

Олимпиаданың негізгі міндеті – студенттердің кәсіби дайындығын бағалау және олардың шығармашылық әлеуетін ашу. Сонымен қатар, болашақ мамандар арасында тәжірибе алмасу мен идеялармен бөлісу үшін платформа құру маңызды мақсаттардың бірі болды.

Іс-шараға 3-4 курс студенттері қатысты. Олар келесі бағыттар бойынша бақ сынады:

• Графикалық дизайн;
• Сәулеттік дизайн;
• Ландшафттық дизайн.

Бірінші кезеңнің жеңімпаздары 2025 жылдың ақпан айында өтетін финалдық кезеңге қатысу мүмкіндігіне ие болды. Финалда олар өз жобаларын жоғары деңгейде ұсынып, республика үздігі атағы үшін жарысады.

Олимпиада ҚазҰӨА-ның дизайн саласындағы көшбасшы оқу орны ретіндегі мәртебесін тағы бір мәрте дәлелдеді. Жеңімпаздарды құттықтай отырып, оларға алдағы финалда сәттілік тілейміз!