Еліміздің өнер мен білім саласындағы ең беделді шаңырақтарының бірі – Темірбек Жүргенов атындағы Қазақ ұлттық өнер академиясы. Өз жұмысын 1978 жылы бастаған бұл оқу орны бүгінде 45 жылдық тарихын артқа тастап, шығармашылық білім берудің үлгісін көрсетіп келеді.

Академияның негізін қалаған тұлғалар – қазақ халқының рухани мұрасын сақтап, ұлттық құндылықтарды дәріптеуге атсалысқан біртуар азаматтар. Олардың еңбегі академия қабырғасында білім алып жатқан студенттер мен ғылыми-зерттеу жұмыстарын жүргізіп жатқан ғалымдардың шабыт көзіне айналды.

Академия кітапханасымен бірлескен «Smart University Press» баспа үйі бұрынғы классикалық құнды әдебиеттерді жаңартып, қайта басып шығарды. Бұл басылымдар қазақ және орыс тілдерінде жарық көрген драматургия, сценография, қолөнері, балет, хореография, костюм дизайны және киноөндірісі салаларын қамтыған.

Оқырмандар назарына Н. Гоголь, Н. Островский, А.Чехов, Лопе де Вега, Ш. Айтматов сынды әлем әдебиетінің классиктерінің пьесалар жинақтары, сондай-ақ Қ. Бекхожин, Қ. Мұхамеджанов, М. Хасенов, Л. Сарынова, Б. Нөгербек секілді қазақ жазушы-драматургтерінің еңбектері ұсынылды. Сонымен қатар қазіргі ғылым мен өнер саласында еңбек етіп жүрген көрнекті ғалымдардың – Қ. Халықов, Г. Әбікеева, О. Батурина, А. Мұқан, Ғ. Әбілдина еңбектері де жарыққа шықты.

Академияның ғылыми кеңесі ұсынған 40 шақты жаңа оқулық пен танымдық кітаптар білім мен өнердің дамуына қосылған құнды үлес болып табылады.