Темірбек Жүргенов атындағы Қазақ ұлттық өнер академиясының Оқу театрында мәдениет пен өнерді дамыту жолындағы елеулі еңбегі үшін шығармашылық сала өкілдеріне марапаттар табысталды. Бұл салтанатты шарада тек белгілі артистер мен ұстаздар ғана емес, сахна сыртында тынымсыз еңбек ететін жандар да лайықты құрметке ие болды.
Салтанатты жиын Қазақстан Республикасы Президентінің Жарлығымен «Қазақстанның халық әртісі» атағын иеленген Дәстүрлі музыкалық өнер кафедрасының профессоры Айгүл Қосанованы құттықтаудан басталды. Сонымен қатар, қызметінде жоғары нәтижелерге қол жеткізген мәдениет саласының өкілдеріне ҚР Мәдениет және ақпарат министрлігінің арнайы марапаттары – «Еңбек ардагері» медалі, «Мәдениет саласының үздігі» төсбелгісі, Құрмет грамотасы мен Алғыс хаттар тапсырылды.
Академия ректоры, Қазақстанның еңбек сіңірген қайраткері Арман Жүдебаевтың атынан жоғары кәсіби шеберлігі мен адал еңбегі, білім беру үдерісін ұйымдастыруға және жетілдіруге қосқан үлесі үшін бірқатар мәдениет қызметкерлеріне Құрмет грамотасы мен Алғыс хаттар берілді.
Сондай-ақ «TYRKI DYNIYESI» ІІІ Халықаралық студенттік театрлар фестивалін жоғары деңгейде ұйымдастыруға және өткізуге атсалысқан Академия қызметкерлеріне де ректордың Алғыс хаттары табыс етілді.
