Темірбек Жүргенов атындағы Қазақ ұлттық өнер академиясының «Кино және телевизия» факультетінің студенттері мен түлегі Канададағы Loon Film Festival халықаралық фестивалі мен Мәскеудегі «Восхождение» IV халықаралық студенттер фестивалінде үш жүлдеге ие болды.
Канаданың Онтарио провинциясындағы Оттава қаласында өткен Loon Film Festival халықаралық фестивалінде 3-курс студенті Ерхат Ерсайынов «Жоғалған арал» фильмімен жүлделі ІІІ орынды иеленді.Екінші рет ұйымдастырылған фестиваль бағдарламасына табиғат, бейбітшілік және жануарлар құқығы тақырыптарына арналған қысқаметражды және толықметражды фильмдер енгізілді. Фестиваль киноиндустрияға арналған FilmFreeway халықаралық платформасының Gold санатында орналастырылған. Жас кинематографистердің жұмыстарын халықаралық деңгейде таныстыруға, кәсіби тәжірибе алмасуға және мәдени байланыстарды дамытуға бағытталған фестиваль аясында көркем, деректі, анимациялық және эксперименттік туындылар ұсынылды.
Сонымен қатар, Академия өкілдері Мәскеу қаласындағы С.А. Герасимов атындағы Бүкілресейлік мемлекеттік кинематография университетінде өткен «Кинобілім: ТМД мемлекеттерінің бірлескен білім беру жобалары» дәстүрлі форумына қатысты. Төртінші рет ұйымдастырылған форумның негізгі іс-шарасы ТМД елдерінің жас кинематографистерін біріктірген «Восхождение» IV халықаралық студенттер фестивалі болды. Оның конкурстық бағдарламасына жеті елден 50 кинотуынды ұсынылды.Фестиваль қорытындысы бойынша «Анимация режиссурасы» білім беру бағдарламасының түлегі Бауыржан Адаевтың «Пуповина» фильмі «Анимациялық фильмнің үздік режиссурасы» аталымында жеңімпаз атанды. Сондай-ақ «Көркем фильм режиссурасы» білім беру бағдарламасының 4-курс студенті Махамбет Мырзаның «Май» фильмі қазылар алқасының «Актерлік өнердегі алғашқы қадамдары үшін» арнайы сыйлығына ие болды.
Аталған жетістіктер Академия студенттері мен түлегінің шығармашылық әлеуетін халықаралық деңгейде танытып, қазақстандық жас кинематографистердің кәсіби тәжірибесін кеңейтуге және отандық кино өнерін шетелдік аудиторияға ұсынуға үлес қосады.
