2025 жылдың 22 қаңтарында Академияда Түркиядан келген танымал шеберлер – Темпо театрының көркемдік жетекшісі, Билкент университетінің профессоры Халук Юдже мен Анкара халықаралық қуыршақ театры фестивалінің директоры, актриса Марина Юдже шеберлік сағатын өткізді.
Көлеңкелі қуыршақ театрының қыр-сырын меңгерген бұл талантты мамандар студенттерге жарық қоюдың әдіс-тәсілдері, қуыршақ жасау мен басқару үдерісі туралы қызықты ақпарат ұсынды. Сонымен қатар, өз елдеріндегі театр өнерінің даму ерекшеліктерімен бөлісіп, қазақстандық драма театрларының жоғары деңгейін ерекше атап өтті.
Шетелдік қонақтар: «Сіздер осындай Академияда білім алып жатқан бақытты жандарсыздар, елдеріңіздегі драма театрларың да жоғары деңгейлі», – деп студенттерге шабыт сыйлап, олардың шығармашылық болашағына сенім артты.
Кездесу соңында Халук және Марина Юдже Академия проректорымен кездесіп, болашақта екіжақты ынтымақтастықты нығайтуға ниет білдірді.
Бұл шеберлік сағаты студенттердің шеберлігін жетілдіруге ғана емес, театр өнерінің жаңа көкжиектерін ашуға үлкен мүмкіндік болды.
