Байділда Бауыржан Нұрбекұлының ұйымдастыруымен 1-ші сәуір — «Күлкі күніне» арналған  «Әзіліңіз жарасса…»  атты шарж  жанрындағы көркем өнер көрмесі ашылды. Көрме аясында шарж  өнеріне арналған туындылар ұсынылып, танымал тұлғалар мен күнделікті өмірдің көріністері  әзілмен бейнеленді. Көрермендер назарына Асанәлі Әшімов, Амандос Ақанаев, Нелли Бубе, Жұмақын Қайрамбаев, Ағымсалы Дүзелханов, Еркін Оразхан, Бауыржан Байділда, Талғат Тілеужанов, Мейрамбек Китанов және т.б. танымал суретшілеріміздің әзіл форматына сай мазмұндалған  өнер туындылары ұсынылды.

    Көрменің мақсаты:  шарж өнерінің ерекшеліктерін көрсету, сатира мен әзіл-ысқақ арқылы қоғамдағы өзекті мәселелерге назар аудару, көрермендерге шығармашылық шабыт сыйлау және Қазақстандағы шарж өнерінің дамуына қолдау көрсету мақсатында ұйымдастырылуда. Сондай-ақ, өнер мен әзілдің байланысын көрсету арқылы көркем шығармашылықтың жаңа қырларын ашу, жас суретшілерді қолдау және қоғамдағы күлкінің маңыздылығын дәріптеу де көрменің негізгі міндеттерінің бірі болып табылады.

   Бұл шара өнердің эстетикалық және мәдени аспектілерін, сондай-ақ күлкі арқылы берілетін астарлы, терең мағынаны зерттеуге бағытталған. «Әзіліңіз жарасса…»  атты шарж көрмесі – күлкі мен өнердің түйіскен нүктесі, сатиралық бейнелеу өнерінің қоғамдағы рөлін айшықтайтын маңызы бар саланы насихаттайды. Көрме аясында ұсынылған шарж туындылары тек әзіл ретінде қабылданбай, терең философиялық және әлеуметтік мағынаға ие шығармалар ретінде қарастырылады. Бұл көрме көрермендерге позитивті эмоция сыйлап қана қоймай, олардың өнерге деген қызығушылығын арттырып, шарж жанрының ерекшеліктерін тереңірек түсінуге мүмкіндік береді.

     Күлкі – адамның ішкі дүниесін бейнелейтін қуатты құрал. Сондықтан бұл көрме әрбір қонаққа көтеріңкі көңіл-күй, шығармашылық шабыт және ерекше әсер қалдырды.