2024 жылғы 10 желтоқсанда Темірбек Жүргенов атындағы Қазақ ұлттық өнер академиясында «Visa Fashion Week Almaty» бас директоры Бауржан Шадибеков сән және костюм дизайны кафедрасының студенттерімен кездесу өткізді. Кездесу барысында ол болашақ сән дизайнерлеріне әртүрлі байқаулар мен фестивальдер аясында тәжірибе жасап, шығармашылық идеяларын жүзеге асыру үшін ашылатын орасан зор мүмкіндіктер туралы айтты.
Әсіресе, сәнгерлердің басты іс-шарасы саналатын Visa Fashion Week туралы ерекше тоқталып, бұл жоба өзіңді суретші және дизайнер ретінде таныту үшін бірегей мүмкіндік екенін атап өтті. Студенттерді шығармашылық және креативті адамдармен кездесулер, жаңа есімдер мен жеке брендтерді ілгерілету мүмкіндіктерімен шабыттандырды.
Кездесу барысында «Next Designer Award» байқауының жеңімпаздары мен финалистері, соның ішінде Темірбек Жүргенов атындағы ҚазҰӨА-ның сән және костюм дизайны мамандығының түлегі Әсел Шингисова және Акмарал Жарасқызы студенттерге өз тәжірибелерімен бөлісті. Олар байқауға қатысу шарттары, кездескен қиындықтар және ынтымақтастық нәтижелері туралы айтып, құнды кеңестер берді.
Кездесу студенттер арасында үлкен қызығушылық тудырды. Олар шақырылған қонақтарға өздерін қызықтырған сұрақтарын қойып, болашақ перспективалар туралы білді.
Осындай шығармашылық адамдар арасындағы достық атмосфера тығыз серіктестіктің кепілі болып табылады, ол жаңа ашылулар мен сән секілді әсем әрі пайдалы салада креативті идеялардың дамуына мүмкіндік береді.
